BADATOR BEHOBIA

3, 2, 1… badator  Behobia! Urteko ekitaldi berezienetako bat ospatuko dugu bihar: lasterketa herrikoien artean klasiko bat da, milaka korrikalari kirolaren ospakizun batean elkartzea lortzen duena. Denek egin nahi dute korrika, eta dortsala lortzea ez da erraza izaten… Aurten 28.000 parte hartzailetan jarri dute muga. Gainera, inoiz baino emakume gehiagok parte hartuko dute biharkoan: korrikalarien %33,8a, hain zuzen ere.

Behobia 1919ko martxoaren 30ean ospatu zen lehen aldiz, eta ehun urte — eta hainbat aldaketa — beranduago, irrikitan gaude biharko ibilbideari ekiteko. 9: 30ean korrikalariak Behobiako auzotik (Irun) habiatuko dira eta 20 km egingo dituzte Donostiako Boulevardera iritsi arte. Lasterketaren exijentzia ezin da zalantzan jarri: Gaintxurizketa (Km. 7) eta Mirakruz gaina (Km. 17) pasako dituzte korrikalariek, eta kontuan hartu beharko dute lasterketak hainbat igoera eta jaitsiera dituela ahalegina erregulatzeko. Ibilbideak 192 metroko desnibel positiboa du.

Antolatzaileek azpimarratu dutenez, Behobia lasterketa bat baino gehiago da, sentimendua da. Hotel Parmako hormen artean ere bizi eta arnasten da sentimendu hori. Gipuzkoako Hotelen Elkartearen bitartez (ADEGIren baitan), Fortuna Kirol Elkartearekin (Behobiaren antolatzailea) elkarlanean daramatzagu urte batzuk, lasterketak hiriari egiten dion ekarpena eskertzeko. Doako logela bat eskaintzen diogu elkarte antolatzaileari 3 egunetarako, eta, horren truke, Fortunak pare bat doako dortsal ematen dizkigu. Dortsal horiei esker, beren dortsala lortu ezin izan duten ohiko bezerek  lasterketan parte hartzeko aukera izaten dute. Halaber, bihar bi dutxa jarriko ditugu eskuragarri, hala behar dutenentzat.

Animazioak, emozioak eta giro onak inguratzen du Behobia; horiek dira biharko eguna berezi egiten dutenak. Posible da bihartik aurrera Behobiaren sentimendua zuregan ere jaio eta haztea. Hurbildu zaitez Boulevardera, Hotel Parmatik bost minutura, eta ikusi korrikalarien iritsiera gurekin. Gozatu!

Argazkia: Royo, El Diario Vasco